Tfal Żabbarin iħejju għall-Festa fl-Iskola Primarja

Ilbieraħ, filmati mxerrda fuq il-midja soċjali mill-paġna uffiċjali tal-Iskola Primarja B ta’ Ħaż-Żabbar inxterrdu m'eluf ta’ nies, hekk kif ħafna apprezzaw l-entużjażmu ta’ bosta studenti żgħar Żabbarin li b’qalbhom kollha pparteċipaw f’din l-attività li kienet organizzata fit-tmiem tas-sena skolastika.

L-istudenti ġew imħeġġa sabiex fl-aħħar jum tal-iskola jmorru libsin flokkijiet ħodor jew koħol, skont il-banda li huma jew il-ġenituri tagħhom jappoġġjaw. Dan sar bħala parti minn inizjattiva li ttellgħet fil-forma ta’ marċ spontanju bil-bnadar u l-marċi fil-bitħa tal-iskola.

Inizjattiva li kienet ta’ suċċess mhux biss fl-iskola, iżda wkoll barra minnha, hekk kif ġibdet simpatija u ferħ fost il-ġenituri u ż-Żabbarin li raw futur mimli ħeġġa għall-parteċipazzjoni soċjali u kulturali fil-festa Żabbarija.

Il-filmati jitkellmu waħedhom dwar l-entużjażmu tat-tfal li xejru bi kburija l-bandiera favorita tagħhom.

Jalla dawn l-inizjattivi jkomplu jiġu organizzati, sabiex il-festa Żabbarija tibqa’ ħajja u mħaddna fil-ġejjieni.

Ara l-filmati hawnhekk:

https://www.facebook.com/share/v/1TYxqJ4QDP/?mibextid=wwXIfr

Ritratt: Zabbar Primary School B (Facebook)