Xogħol Kbir ta’ Manutenzjoni fil-Maħżen tal-Għaqda

L-Għaqda tagħna għandha l-unur li hi s-sid ta’ maħżen kbir u sabiħ, li fih mhux biss jinħażen l-armar kollu tal-festa, iżda jsir ukoll ħafna xogħol siewi u artistiku li jsebbaħ il-festa Żabbarija. Dan il-maħżen huwa attiv tul is-sena kollha, b’ħafna voluntiera li jaħdmu bla waqfien sabiex il-festa tkun dejjem waħda mill-aqwa.

Il-maħżen inbena fit-tmiem is-snin tmenin, wara deċiżjoni fl-1989 biex jinbena maħżen ġdid għall-armar tal-festa tal-Madonna tal-Grazzja. Ix-xiri tal-post fi Sqaq San Ġakbu sar f’Marzu 1990.

Riċentement, sar xogħol kbir ta’ manutenzjoni li jinkludi r-restawr tal-faċċata, manutenzjoni fuq l-appoġġi u restawr strutturali - grazzi għall-appoġġ finanzjarju tal-Kumitat Ċentrali u l-ħidma ddedikata tal-voluntiera. Se jiġi wkoll installat arblu ġdid, filwaqt li ġew miżjuda xkafef tal-ħadid sabiex jinħażen aħjar l-armar dejjem jiżdied.

Ix-xogħol li sar huwa pass importanti biex ikomplu jitjiebu l-preparazzjonijiet għall-festa tal-Madonna tal-Grazzja u l-Marċ il-Kbir ta’ San Mikiel. Dan juri l-impenn tagħna biex inkomplu nsebbħu lil Ħaż-Żabbar fi żmien il-festa, b’dedikazzjoni, passjoni u rispett lejn it-tradizzjoni tagħna.