KEMM HEMM SHELTERS F’ĦAŻ-ŻABBAR?

Is-snin tat-Tieni Gwerra Dinjija kienu snin ta’ tbatija kbira għall-poplu Żabbari, bħalma kien għall-bqija tal-poplu Malti. Hu magħruf li matul dan il-perjodu mwiegħer tilfu ħajjithom madwar 62 Żabbari u Żabbarija.

Biż-żieda tal-attakki mill-ajru u l-perikli li kienu jheddu lill-Maltin, ħafna miż-Żabbarin kienu jsibu kenn f’shelters li tħaffru fil-qalba tal-lokalità. Skont riċerka u tagħrif storiku, f’Ħaż-Żabbar kienu tħaffru madwar 30 shelter tal-gwerra, b’uħud minnhom jinkludu spazji pubbliċi kif ukoll kmamar privati — xi drabi konnessi direttament mad-djar ta’ fuqhom sabiex jipprovdu aktar kumdità u sigurtà lill-familji individwali.

Fost dawn, żewġ shelters ewlenin jinsabu f'Misraħ is-Sliem u f'Misraħ San Ġakbu, li għadhom miżmuma f’kundizzjoni tajba u għandhom jiġu apprezzati sal-lum il-ġurnata. Dan kollu grazzi għax-xogħol kontinwu u l-impenn amministrattiv, kulturali u storiku tal-Għaqda tagħna, li mhux biss ħadmet biex dawn il-postijiet iservu bħala monumenti ħajjin tal-istorja reċenti tagħna iżda ukoll iservu bħala spazzju kulturali. 

Ritratti: Malta Underground (Facebook)