Hekk kif jibda l-istaġun tas-sajf, magħna jerġa’ jiġi l-ferħ u l-entużjażmu li jġibu magħhom il-festi Maltin – żmien li jibdel il-wiċċ tar-raħal u tal-belt b’dawl, armar, ħoss u ferħ. Fil-jiem tal-festa, l-irħula u l-ibliet Maltin u Għawdxin jieħdu l-ħajja b’ċelebrazzjonijiet li jħaddnu t-tradizzjoni, l-għaqda u, fuq kollox, id-devozzjoni.

L-istħarriġ maħruġ illum tal-Istat tan-Nazzjon ikkonferma kemm il-festa Maltija għadha għażiża għalina l-Maltin u kemm dawn iċ-ċelebrazzjonijiet jagħtuna sens qawwi ta’ identità u komunità.

Illum ninsabu mitt jum eżatt ’il bogħod mill-festa tagħna. Mitt jum ieħor it-toroq u l-imsieraħ ewlenin ta’ Beltna jilbsu l-libsa ħadranija u jilqgħu b’devozzjoni 'l Ommna tal-Grazzja. Huma jiem li jġibu magħhom emozzjonijiet sbieħ, ferħ u entużjażmu fost iż-Żabbarin kollha.

Wara s-suċċess li ksibna fl-aħħar festa, l-Għaqda tagħna qed taħdem b’dedikazzjoni akbar sabiex din is-sena noffru ċelebrazzjonijiet mill-aqwa, uniċi u ta’ livell għoli. L-isforzi li saru s-sena l-oħra wasslu biex il-festa tagħna tingħata rikonoxximent prestiġjuż bħala waħda mill-isbaħ u l-aqwa f’Malta. Dan l-unur jagħtina aktar motivazzjoni biex nerġgħu noħorġu b’festa li toħloq memorji sbieħ u tkompli tgħaqqadna.

Nistednuk tingħaqad magħna. Agħti s-sehem tiegħek sabiex flimkien inkomplu nippreparaw ruħna għal ġimgħat ta’ ċelebrazzjoni, devozzjoni u għaqda f’Awwissu u Settembru li ġejjin.

Ritratti Simon Muscat